Suliffeqarfinnut inuussutissaleriffiusunut nakkutilliiartornerit

Uumasunut Nakorsaqarnermut Inuussutissalerinermullu Oqartussaqarfik (UNIO) Nunatsinni inuussutissat isumannaatsuunissaat siuarsarniarlugu suliffeqarfinnik inuussutissaleriffiusunik nakkutilliinermik suliaqarpoq.

Suliffeqarfinnik inuussutissanik avammut nioqquteqartunik Danmarkimi Inuussutissalerinermut Aqutsisoqarfik (DIA) nakkutiginnittuuvoq.

Suliffeqarfimmik inuussutissaleriffiusumik illit piginnittutut inuussutissat pillugit inatsimmi piumasarineqartunut suliffeqarfiup naammassinninnissaa akisussaaffigaat.

Suliffeqarfiutinni inuussutissat pillugit inatsimmi piumasarineqartut eqquutsinneqarnersut qulakkeerniarlugu nalunaaruteqaqqaarnani UNIO nakkutilliisinnaavoq. Nakkutilliinerup ilaatut suliffeqarfik najuuffigalugu illutaa misissuataarneqassaaq kiisalu suliffeqarfiup nammineerluni nakkutilliinissamik siunertarisai allallu uppernarsaataasut attuumassuteqartut nakkutilliiffigineqassapput.

Nakkutilliiartorneq nalunaaruteqaqqaarnani ingerlanneqassaaq, taamaattumillu suliffeqarfiutivit nakkutilliiartortumit nakkutilliiffigineqarnerani siumoortumik paasitinneqassanngilatit. Suliffeqarfimmit nakkutilliineq aallartitsinnagu nakkutilliisup takkunninni tamatigut nalunaarutigisassavaa.

Nakkutilliiartornerup nalaani imatut pisoqassaaq:

• Suliffeqarfimmik misissuineq – init, maskiinat, atortut/pequttat, toqqorsivik nioqqutissallu.
  Avatangiisit/pequttat naleqquttumik aaqqissuunneqarsimanersut, kiisalu ilaatigut eqqiluisaarnissamut piumasaqaatit qanoq eqqortinneqarnersut pillugit nalilersuisoqassaaq.
• Suliffeqarfiup nammineq nakkutilliisarneranik misissuineq.
  Nalunaarsukkat naammannersut, kiisalu immikkoortumi piumasaqaatit atuuttut eqqortinneqarnersut nalilerneqassapput.
• Suliffeqarfiup allagaataanik/uppernarsaataanik misissuineq.
  Suliffeqarfiup akuerineqarneranut tunngasut misissorneqassapput. Suliffeqarfiup suliaanut attuumassuteqartut uppernarsaataasut allat aamma misissorneqarsinnaapput.

Nakkutilliinerup nalaani ilitsersuunneqassaatit
Nakkutilliiartornermi pisariaqartitsineq malillugu, inuussutissat pillugit inatsisip imai, nassuiarneqarneri tunuliaqutaalu pillugit ilitsersuunneqassaatit, taamaalillutit maleruagassat paasiniassagakkit malinnissaanullu kajumissuseqalerlutit. UNIO-mut pingaaruteqarpoq nakkutilliinerup ilaa siunnersortinnermik aamma illit piginnittutut ilinniik ajunngitsumik/ torersumik maleruagassat qanoq paasineqarnissai malinneqarnissaallu oqaloqatigiissutiginissai

Taamaaliornikkut nakkutilliineq amerlanertigut kinguneqarluarnerusarpoq suliffeqarfiutivit ingerlanneqarneranut UNIO-p sunik piumasaqaateqarneranik paasinninnissaq ajornannginnerulissaaq.

Nakkutilliisumut suut tamarmik takusinnaatitaapput
Suliffeqarfiutinni inuussutissanik nioqqutissiornermut toqqorsinermullu atatillugu ininut tamanut nakkutilliisoq isersinnaassaaq. Nioqqutissiorneq pillugu pappilissat uppernarsaataasut tamaasa takutinneqarnissaat assilinissaallu nakkutilliisup piumasinnaavai.

Tamanna pisariaqartinneqarpat illit suliffeqarfinni tunisassianiit atortuniillu misiligutissanik tigusisoqarsinnaavoq. Pissutsit ilai nakkutilliisup suliffeqarfimmi nakkutilliinerini tamani misissorneqassapput, allat ilaannikkut misissorneqartassallutik.
Nakkutilliinermi ajornartorsiutinik nassaartoqarpat, kingornatigut nakkutilliinermi tamanna iluarsineqarsimanersoq uppernarsiniarneqassaq. Assuarliutigineqartunut tunngatillugu iluarsisimanerannut uppernarsaammik piffissami killilikkami (soorlu assilissanik) nassiusseqqullutit aamma qinnuigineqarsinnaavutit.

Nakkutilliinermut atatillugu suliffeqarfiup pisinnaatitaaffii
Nakkutilliinermut tunngatillugu suliffeqarfik arlalinnik pisinnaatitaaffeqarpoq. Nakkutilliisup qanoq isummersorneri ilaatigut paasissavatit, taakkununngalu isummat pillugu aperineqassaatit. Nakkutilliiartornermut atatillugu toqqaannartumik suliffeqarfik tusarneqanngippat, kingusinnerusukkut e-mailikkut oqarasuaatikkulluunniit tusarneqarnissaminut suliffeqarfik periarfissaqassaaq.

Nakkutilliineq naammassippat suliffeqarfik nakkutilliinermik nalunaarusiamik nassinneqassaaq. UNIO-mit suna paasineqarsimanersoq aamma suna misissorneqarsimanersoq nakkutilliineq pillugu nalunaarusiami allaaserineqassapput.

Inuussutissat pillugit inatsimmik unioqqutitsinerit paasineqarpata, nakkutilliinermik nalunaarusiami iliuusereriikkanut kinguneqartitsisoqarsinnaavoq. Iliuusereriikkanut kinguneqartitsinernut imaattunik periarfissaqarpoq:

• Unioqqutitsinaveersaaqqusineq
• Peqqussutit
• Inerteqqut
• Politiinut nalunaarutiginninnerit

Unioqqutitsinerit qanoq ittuuneri iliuusereriikkanut kinguneqartitsinermut aalajangiisuussapput.

Nakkutilliineq pillugu nalunaarusiami unioqqutitsinerit allaaserineqarsimassapput, aamma ajornartorsiutip iluarsinissaanut suliffeqarfik qanoq sivisutigisumik aaqqiinissaminut periarfissaqarnersoq ullulerneqassaaq.

Inatsisip atuuttup malinnissaa suliffeqarfiup nammineq tamatigut akisussaaffigaa.

Nakkutilliiartornermut imaluunniit nakkutilliiartornermik nalunaarusiami iliuusereriikkanut kinguneqartitsinermut atatillugu maalaaruteqarusukkuit, nakkutilliiartornermut nalunaarusiap tiguneraniit sapaatip akunneri 4-at qaangiutsinnagit maalaaruteqarsinnaatitaavutit.

Maalaaruteqarusukkuit allakkatigut tamanna pissaaq uunga [email protected] imaluunnit allakkatigut uunga:

Aalisarnermut, Piniarnermut Nunalerinermullu Naalakkersuisoqarfik
Imaneq 1A 701
Postboks 269
3900 Nuuk

Maalaarummi makku ilanngunneqassapput:

• Atit aamma attaveqarfissamut paasissutissat
• Suliffeqarfiup inuussutissaleriffiusup aqqa najugaqarfialu
• Suliap normua
• Maalaarutiginiakkavit itisilerlugu allaaserinera

Maalaarutit piffissaliussaq qaangiutsinnagu tiguneqareersimassaaq. Maalaarutit piffissaliussaq qaangiutereerneratigut tiguneqartut nalinginnaasumik suliarineqarneq ajorput. Maalaaruteqarsimagaluarlutit maalaarutip suliarineqarnerata naammassinissaata tungaanut allamilluunniit aalajangiisoqarnissaata tungaanut, aalajangiineq aalajangiunneqartoq maliinnassavat.

Maalaarutip suliarineqarnera sioqqullugu aalajangiinerup malinnissaa kissaatiginngikkukku, maalaarummik aalajangiinerup suliarineqarneranik utaqqineq pissutigalugu, naammassineqarnissaata kinguartinneqarneranik taaneqartartoq Aalisarnermut, Piniarnermut Nunalerinermullu Naalakkersuisoqarfimmut qinnutigisinnaavat.

Aalajangiinerup suliarineqarneranik utaqqineq pissutigalugu, naammassineqarnissaata kinguartinneqarnera pillugu matuma kingorna apeqqummut Aalisarnermut, Piniarnermut Nunalerinermullu Naalakkersuisoqarfik immikkut ittumik isummissaaq, apeqqummullu tassunga aalajangiineq pillugu sapinngisamik piaartumik nalunaarfigissallutit.